Sessiz okumak, 5 klas

Ilkyaz zararı

Ilkyaz. Miti, Mani hem onnarın mamusu aulda çotuklar arasında fasüle ekärdı. Şansora üülen geçtiydi, açan çocuklan kızçaaza mamusu dedi:

-Bän işä gideerim, ama siz nekadar fasülä bakırda kaldı ekäsiniz. Biriniz hendecik kazacek, biriniz da koyun. Annaştık mı?

Uşaklar bu işä hiç sevinmedilär. Onnar diil ani sevmesin yardım etmää, ama vardı neetleri saat beştä klubta kino görmää.

-Kalın saalıcaklan,-dedi mamusu da gitti.

Saat yarım beşäydi, ama fasülä bakırda bitmäzdi.

-Geç kalacez,-dedi Miti.

-Sanki näbalım?-sordu Mani.

-Bilersin mi ne? Hadi taa tez bitirecez te bu çekedilmiş sırayı, sora da kazacez kuyu da onun içinä gömecez kalan fasüleleri. Mamuya söleyecez ani bitti, etişmedi sıraları ekmää.

Mani buna kayıl oldu. Sora hızlı-hızlı bitirdilär ekmää çekedilmiş sırayı, kazdılar bir kuyu da onun içinä döktülär, ne kalmıştı bakırda. Ötää-beeri çiynediynän onu, Maniylän Mitika rubalarının diişip, kinoya alatladılar.

Avşam üstü uşaklar mamusuna söledilär, ani iki sıraya fasülä etişmedi.

-Yok, orayı bu yıl bişey ekmeyecez, biraz sıralar dinnensinnär. Genä islää, ani siz yardım ettiniz öbür sıraları doldurmaa.

Birkaç afta geçti, islää yaamurlar yaadı, ne ekildi er üzünä hepsicii çıktı.

Bir gün avşam ekmeeni idiktän sora, Mitiyä mamusu sordu:

-Çocuum, kim sanki bizim aulun içindän geçti, bir kuyu içinä auçlan fasülä eksin? Zavallı toomnar hepsicii-hepsicii çıkmışlar, zeetleneerlär – onnara pek sıkışmalık soluyamêêrlar.

-Görmedim, bilmeerim-uşaklar cuvap edärdilär.

Sabaalän Mani hem Miti saklı içerdän çıktılar da tez aula girdilär. Onnar burada gördülär, ani onnarın zararları üzä çıktılar. Ikisi dä iilik kafaylan içeri girdilär. Utanırdılar mamusunun üzünä çıkmaa.

Todur Marinoglu

Miti hem Mani ne yapırdılar çotuklar arasında?

Uşakların anası nereyä gitti?

Ne sımarladı uşaklara anaları?

Ne neetleri vardı uşakların?

Nasıl düşünmüşlär çıkmaa bu işin altından ?

Ne sölemişlär avşamda uşaklar mamusuna?

Bir avşam mamusu sölemiş:

Ne cuvap verdilär çocuklan kız?

Nası düşüneersiniz, nası uyudular uşaklar gecä?

Nezaman Mani hem Miti gittilär aula?

Nası onnar bundan sora götürdülär kendilerini?

Neyä üüreder bu annatmak?